SLP: HniangHniang, Laimp4 nih biaruah kan in duh i caan na kan pe kho hnga maw?
HH: Caan ka pek khawh ko lai. Laimp4 nih ka hmanthlak tang ah ca nan ttialmi te kha ka uar tuk si.
SLP: Zei kan ttialmi te kha dah?
HH: "A vapa nih a dawt lo ahcun kan chuh tthan lai", nan timi kha.
SLP: Laimp4 lawng si lo in Laimi vialte nih nang cu kan in dawt tukmi pei na si cu. Kan duhmi bia kan in hal colh ko lai, a hmasa bik ah na chungkhar kong theih kan duh ko.
HH: Ka nu le ka pa cu Pu Lian Kim (Tlangpi) le Pi Sui Cin (Hakha) an si. Unau pali lak ah a hniang bik ka si. Fanu hniang ka si hlei ah ka min bantuk hin an ka Dawt Hlei ca-ah kaa hnauh ngai lo maw zei.
SLP: Fim cawnnak lei ah zei tiang dah na cawn?
HH: Mandalay in B.A. History le Hakha Chin Christian College in B.Th. ka awng ve.
SLP: Atu hi zei tuah ding ah dah US nan ratnak hi a si?
HH: Mautam concert tuah dingah Chin Evangelical Baptist Church, Indianapolis nih an kan cahmi a si.
SLP: Mautam ca i nan ipumpeknak cu uar nan um bak. A hoho dah hlasak thiam a ra mi hna cu nan si?
HH: Sung Tin Par, Solomon Menrihei le keimah kan si.
SLP: Tedim le Mizo hlasak thiam an cah ve hna lo maw?
HH: Tedim in Thawn Kham le Mizo in Mimi Lalzamliani zong an cah ko hna na-in passport le visa ah an buai deuh ca-ah an ra kho lo.
SLP: Khua zei hna dah nan kal i, voi zeizatdah concert cu nan tuah khawh?
HH: A hmasa bik ah Dallas, cu hnu ah Battle creek, California, Los Angelis, Indianapolis, Washington DC le Atlanta ah concert kan tuah cang.
SLP: US khualipi cu nan cul dih ko cu ta. Khua zei ah dah a zohtu an tam bik hnga?
HH: Indianapolis le Dallas hi a zohtu minung an tam bik. Indianapolis hna cu zan hnih tiangtiang tuah asi.
SLP: Concert pakhat ah hla fung zeizatdah nan sak?
HH: Cawnmi cu fung hra a si nain, request mi he cun fung 15 tluk hrawng kan sak.
SLP: A tumtu tah cawn chom lengmang an si tikah nan lung khan an si maw?
HH: A tumtu hna hi nikhat lawng cawn a si ko nain an thiam ngaingai ko. Kan hlasak mi cu mi nih rak theih cia dihmi a si fawn tikah an thiam tuk ko.
SLP: Laimi deuh lawng te maw a tumtu an si?
HH: Indianapolis le Washington DC ah cun drum hi mirang nih an tum, a dang cu Laimi an si ko.
SLP: Lai hla deuh maw nan sak, Kawl hla le mirang hla hna nan sa ve maw?
HH: Kei cu Lai hla hi tam bik ka sak ko. Kawl hla le Mirang hla zong a herhnak zoh in ka sak thiamthiam. Sung Tin le Solomon zong anmah siarem deuhning in an duhmi hla an sak ve ko.
SLP: Mipi lei nih an in conglomhning hna ah na lung a tling maw?
HH: Mirang ram kan phan kan ti na-in, Laimi lawng te kan hmuh hna i US phan hmanh ah kan i ruat lo. Rangoon in Hakha kan va phan rua ti tluk in kan ruah. Mipi lei an kan lawmhning ah ka lung a tling tuk ko. Mirang ram um hrat cu an ral zong a ttha ngai.
SLP: Laimi lawng te na hmuh hna cu Pathian thluachuah a si ko cu. Mirang ram ah thla hnih fai na um va si kaw, mirang holh hmang lo bak in na va um ko ne lo maw?
HH: Na van ka hal cu, mirang holh ka holhnak hi vanlawng kai lai ah security biahalnak ka lehmi te lawng asi. Cu lo cu Lai holh lawng te ka va hmang ko.
SLP: Hlasak lio pangpar pek khi a ttha ko na ti maw a ttha lo na ti dah?
HH: Pangpar pek hi a ttha ka ti ko. An kan lawmhpi langhternak asi ve. Pangpar petu nih pek bang pek lo bang i an kan hlen bel ah khin kan hlasak le kan laam aa laklawh deuh tawn. Timing kan auh deng tawn kan ti lai cu.
SLP: Zuri nih an in lampi thlulh hna ah khin tah na thin a hang pah maw?
HH: Zuri lampi khi mipi nuamhnak asi ve i a ttha ve ko. Van kuhchih phun belte khi um hlah sehlaw a ttha deuh hnga.
SLP: (Zuri tlangval pawl HniangHniang bicahmi hi thei cang u, lampi khawh a si kuh lo ding a si lai). Concert nan tuah tawn ah a har na ti mi a um maw?
HH: Concert kan dih hnu i kan thabat kan i damh cang lai kan ti lio ah zuri tlangval veizat nih hman hna an kan thlakpi, an kan kuh an kan zam thulhthalh ah khin cun lawi vurmar khi ka duh tawn.
SLP: Stage cung na hlasak ah hin na laam (rock) ve chin lengmang cang. Rock le laam pah hi a tthatnak a um maw?
HH: A hla zulh in cawlcangh thiam cu a ttha tukmi a si. Mipi lei zong nih kan laam deuh le van cawlcangh deuh ah hin an tha a tho deuh ve i puai a nuam deuh ko.
SLP: Mipi lei nih nan hla rak zonh le stage tang i an rak laam ve ah khin tah?
HH: Kan hla an rak kan zawnh le an laam ah khin kan tha a tlung chin lengmang ve, buai lo te an laam ahcun a ttha tukmi asi. Mipi nih zawnh ve dingah kan sawm chih tawn ko hna.
SLP: Zei tik lio in dah hla le muzik lei ah hin nai hman?
HH: Ka nu le ka pa hi hlasak a huammi an si. Holh ka thiam ka hin kan chungkhar in hla kan sa tti tawn hna. An ka puak lio te hin hla chuahpiak lawng ah nai hngilh tawn an ka ti. Hla duh phun hrimhrim ka rak si ko rua hi ta.
SLP: Hlasak zuamnak ah naa tel bal maw?
HH: 1994, 1995, 1996, 1997 kum li chung hi Kawl ram pumpi Sak-Laam-Ttial-Tum zuamnak ah hlasak ka rak i zuam bal. A kum khatnak ah hin lawmman sawhsawh cu an ka pek ve. A kum hnihnak in kum linak tiang hi pakhatnak laksawng ka hmuh.
SLP: Kawl hla phel na chuah ve lonak kong?
HH: Kawl hla chuah hi Thu Ain Tin he kan rak i tim. A hla zong a cheu cu kaa khumh manh cang. Amah sak lai te ah vanchiat ah a ka thihtak. Cuca-ah kan chuah khawh thai lo nak cu a si.
SLP: Kawl hla na rak sak lo zong hi Laimi ca-ah a rak ttha ko. Nangmah Laihla saknak thawng hin mino nih Lai bia le hla van uar a si hi upa zong kan i lawm tuk. A si ah, Tape, CD, VCD ah phel zeizat dah nai tel cang?
HH: Phel 60 renglo deuh ah kaa tel ve.
SLP: Laimi lak ah hlasa tam cem na si men lai. Hla tah na phuah bal ve maw?
HH: Hla hi ka phuah bal lo, mi phuahmi lawng ka sa. A awthluk tu hi cu ka duhning in ka remhpiak ve tawn hna.
SLP: Rap le chanthar hla le chan hlun hla ah na hmuhning?
HH: Chan hlun hla zong thlau loin chan thar hla le Rap hla zong cu kan dawi ve ding a si tiah ka ruah.
SLP: Muzik lei cawnnak hi na ngei bal maw, cawn hna nai tim lo maw?
HH: Cawnnak ka ngei bal lo. Muzik lei cawnnak hi um kho sehlaw cawn cu ka duh tuk ko.
SLP: Pianthar hnu love song sak kongah na hmuhning?
HH: Pianthar hnu love song a sa duh ti lo mi cu ka lawmhpi tuk hna. Love song kan sakmi nih Pathian he kan i pehtlaihnak le kan nun a hrawh lo ding hi a biapi deuh ah ka ruah. Ram hla le love song hla hna hi kan Lai nunphung le kan tuanbia a langhtertu an si ve ca-ah sak ti lo in tlau lan lai cu ka ruat kho lo.
SLP: Lai hla tthanchonak ding ah zei dah a herh?
HH: Copy right kan upat a hau. Quality ngei tein chuah kan herh fawn. Lai bia le hla kilvennak ah a cawtu hna zong nih icopy lo tein phel khat cio tal cu rak cawk ve ding a si. Hla ttialtu hna hi aman phalh ahcun mah nak ttha hin an kan ttialpiak khawh lai. Hla satu le a tumtu hna ca zongah pawcawmnak tlak in kan tuah khawh ahcun Lai hla a tthangcho hrimhrim ko lai.
SLP: Pumpak kong deuh kan hal tuah lai.US Lai tlangval nih an in sah tung lai va si kaw, zeitindah bia na leh hna?
HH: A ka sahmi hna maw? (ningzak hmai sen nawn in a ni) "Caan ka pe deuh ulaw kaa ruat rih lai" ka ti hna. An lung tak a si le si lo zong hniksak an hau ve cu. Fawi tuk i sahhmang an um tawn ca-ah nu nih ralrin thiam ngai kan herh ve.
SLP: Tlangval theih duh bikmi bia, "Ngaihzawn le hammi na ngei maw?
HH: Mah kong cu pumpak kong asi ca-ah kan let lai lo. Rakka ngaithiam ko, sorry bak asi.
SLP: Na ka leh lo ca-ah mipi nih rak zawndamh cio ko hna seh. Pasal taktak ca ding ah na duh phun tah?
HH: (1) A piangthar mi asi lai. (2) A ka dawmi a si fawn lai. (3) Muzik lei a ka bawm kho mi a si lai. (4) Mah Laimi phun te cu si kho sehlaw ka duh bik.
SLP: Laimp4 zong nih "A vapa nih a dawt lo ahcun kan chuh lai", kan ti cang kha. Na duh phun te cu Bawipa nih in pe ko seh. Parcel cah kong ah hin tah na hmuhning?
HH: Thinlung i theih taktak loin cah cu phak hnu ah buai khawh a si. A buaimi zong an um len cang. Cuca-ah cahtu zong cahmi zong nih caan laak deuh in thinlung i hngalh hnu ah icah si sehlaw a ttha bik hnga. Cahmi zong nih a hmun phak hnu ahcun ihnek lawlaw ding a si ve. An chawva le ramdang phak lawng duh i cahtu duh taktak ttung lo cu thluachuah kan hmu lai lo.
SLP: (Parcel cahtu le cahmi nih rak icinken u). Zu hi tah din thiam ahcun a poi lo, na ti ve maw?
HH: Laimi lak ah zu din a thiam mi kan hmu rih hna lo. Zumtu Khrihfa zong kan si ca-ah ding lo te um hi a ttha bik ko.
SLP: Ramdang peem kongah na hmuhning?
HH: Laimi ramdang kan pem hi a ttha ko. Amahbelte mi phundang sin ah pil lo tein Laimi sinak thlau lo tein hmailei ah thangcho ding in cawnnak lei hi tha rak pe cio u tiah kan cah duh hna.
SLP: US Lai mino na hmuhmi hna hi zu hna an ding tuk maw, na lung an in tong maw?
HH: US mino lak ah tlangval cia in a phanmi hna hi zu a dingmi an tam deuh i, US ah a tthangmi mino cu zu ding lo tein biaknak zongah an i hmang, an fel tuk hna. CBMC mino 50 renglo sinah sau ngai ka caam tikah zuri le zurim a nam mi an um bak lo.
SLP: DVD chuah hna nai tiim ti maw?
HH: US ka tlawn lio ka hmuhtonmi kong hi DVD chuah kaa tim ko. Love song phel khat le Pathian hla phel khat chuah kaa tim. Video zong ka thla pah, Kawlram in Metal Zone ah kaa khumh te lai.
SLP US na tlawn lio DVD cu hmuh lai kan i ngaih tuk ve. A donghnak bik ah ramdang pem Lai mino sinah biacah na duhmi?
HH: Ramdang pem, mino hna nih hin muzik lei, a tum, a sak, a tial, recording le song engineer ah professional tiang thiam i zuam u. Lai DVD tampi chuah i zuam u. Cuticun Lai bia le hla hi nan kilven khawh lai i, Lai hla le Lai holh zong a nung kho peng lai. Pathian philh hlah u, Lai nunphung kilveng u, Ram ttha ah fimnak sangpi tiang cawng ulaw, Lairam hi van kan remhpiak te u. Tlang cung chokhlei le senri an parnak Lairam ah nehhnu van khirh tawn ulaw kan i tong tthan te hna lai. Lai mino vialte kan dawt tuk hna.
SLP: HniangHniang, caan na kan pek khawh ca-ah kan i lawm.
HH: Kei zong kaa lawm tuk ve. Laimp4 ah ka rak in leng tawn hna lai.
Dawt Hlei Hniang
