SLP: Dim Dim, nang hi CBMC HniangHniang tiah na min an chim ngai. Laimp4 chiah dingah bia kan in hal kho hnga maw?

DD: Keimah hna cuti biahal nan duh ahcun angah tuk ko. (Ningzak nawn, ngerhnguai nawn te khin bia a chim, biangkuar te hna a ngei i duh a nung ngai)

SLP: Na tuanbia tawi na kan chim kho hnga maw?

DD: Ka nu le ka pa cu, Lungding khua mi, Pu Ta Can le Pi Tial Sung an si. Thantlang khua ah ka chuak. Atu hi Maryland, USA ah ka um.

SLP: Kio Hmung le Cer Hliang te khua dah mu na si. Cer Hliang bia kan rak hal le pei, "Lungding khuami cu cengkawl kan dawpnak ah kan hrawmhrawl a tha i hlasak kan thiamnak a si" a rak ti cu. Cengkawl na dawp ve caah hlasak na thiam ve ko rua hi?

DD: (Thir hliahmah tein a nih hnu ah) Kei cu cengkawl ka dawp bal ve lo, ka nu nih a ka dawp piak mi ka ei tawn, he…he..

SLP:Na nu cengkawl dawpmi na einak in na hrawmhrawl a tha ve a si lai cu. Na nu cengkawl dawpmi cu ei ka duh ngai ve. Atu hi kum zeizatdah na si? Zeidah na cawn lio? Laiholh tha tein na thiam maw?

DD: 2009 ah hin kum 14 ka si. High School ka kai ve cang lai. Laiholh hi tha te in ka thiam ko.

SLP: Mirang zong hi kum 14 cun minthan an i thok tawn ko. Nang zong minthan nai timh bak a si ve ko hi, izuam cuahmah ko. CYO hlasak zuamnak ah pakhatnak na hmuh ti kan theih i kan in lawmhpi. Cu hlan hlasak zuamnak ah nai tel bal maw? Minung zeizatdah nan i zuam? Nai zuam hlan ah pakhatnak hmuh hi nai ruah maw?

DD: Ka veikhat zuamnak a si. Hlasak ai zuam mi hi CYO area pakhat in minung pahnih cio zuam khawh a si, kan zapi te ah minung pariat kan i zuam. Pakhatnak hmuh ding hi kai zum hrimhrim lo. Ka aw nak in ka hla a that ruang le ringawn tumtu hna an thiam ruang ah pakhatnak ka hmuh hi a si tiah ka ruah.

SLP: Aho nih dah na hla cu an phuah piak? Na sak lio ah na hla bia na tuar(feel) kho maw?

DD: Hi hla a phuahtu hi tlangval Po Jonah a si. Ka sak lio ah hin hlabia hi ka feel khawh ko. "A lang lo tlang in biazai nem te rung in cah hna lawng, kan lennak zalam idang hmanhseh kan tummi ikhat seh, …. Tlang cung chokhlei le senri an par tthan tikah kei zong nehhnu khirh in ruun khat ah kan leng tthan lai" ti ka sak lio ahcun Lai lei kan hawikawm hna mitthlam ah an hong cuang, ka mitthli hna a hai deng taktak ko.

SLP: Hlabia tuar(feel) khawh ah hin a thakhun ti a si. Cu zong cu na mi teinak a si lai tiah ka zumh. Na hlabia te cu na kan chim kho hnga maw?

DD: A hla min cu, "Kan Leng Ti Than Lai" ti a si.

Kan Leng Ti Than Lai Thalkhuapau chuah cun fing le tlang kip in Tlang cung chokhlei, senri hna rung en than lai Kan semnak khua te ah. Khupthirual hawi nih nuam chialmal tein Zalam pheihrawn ah duh in leng ti hna lai Kei bel nan zuun tuar rih lai.   Chorus:   A langlo tlang in biazai nem te rung in cah hna lang Kan lennak zalam i dang hmanh seh Kan tummi I khat seh, Va bang tlengkhat thu in leng ti than dingin Lungthli tum ti u sih Tlangcung chokhlei, senri an par than tik ah Kei zong neh hnu khirh in Ruunkhat ah kan leng than lai. Kan semnak tlangin zilthli rung hrang tawn Semnak nu le pa hram thawng ka theih zawn ah Lung kuai in ka tap tawn Seino rual nan lung thir bang in fek seh Kan semnak khuate ah khua a dei hlan tiang Kaamlo chuncha bang dir u.   Chorus Bridge   Zeitik tiang hen nan zuun tuar in ka vaih rih hnga Tonthannak caan hngak in thlaza ka cam tawn ee…   Cho + Cho   Kei zong neh hnu khirh in Ruunkhat ah kan leng than lai.

 

SLP: Na hlabia pei a rak ttha tuk hi, ka van relnak hmanh in mitthli a hai deng tak ko. A si ah, zei Muzik Band nih dah an in tumpiak?

DD: Kan Khrihfabu CBMC Muzik Group nih an ka tumh. Tv. SailoThang (Keyboard), Tv. Po Jonah (Rhythm), Tv. David Lian Lal Hmung (Bass), Tv. Biak Hlei Sang (Drum) hna an si. Mino tete an si nain an thiam ngai ve ko. Kei hna nih cun kai uang tuk hna.

SLP: Nai zuam hlan ah cawnnak tha tein na ngei maw? Na sak lio ah na thin a phang pah maw?

DD: Cawnnak hi ka ngei ko nain, kal lai zan lawng ah hlabia hi ka sin a phan. A zan ah a bia he kan cawng, lampi kal pah le phak zan ah keimah tein a hlabia ka zah. Hlasak hi kai zuam bal lo le a voikhatnak a si ca-ah ka thin hi a phang ngai ko nain ka hon sak taktak i, mipi hna nih tha an hon ka pek hnu cun ka tui chin lengmang.

SLP: Thilthuam le cawlcangning hna ruahnak an in cheu pah maw?

DD: An ka cheuh ko. Lai thuam he sak ding, sak tikah a bia sullam hoih in kut hna ke hna pum hna cawl pah ding an ka ti. Laitlang lei kong sak lio ah kut in Laitlang lei hei sawh ding, fingtlang kong sak lio ah kut hna cunglei ah hlerh ding, ti te hna an ka chimh. An ka chimhmi ka van tuah tikah a rak work taktak ko.

SLP: Kum 14 lawng a simi nih cu bantuk in cawlcangh he mipi hmai ah hla na sak khawh cu kan lawmhpi tuk ve. Hla satu tampi an baunak zawn a si. CYO zuamnak ah mark petu hi aho te dah an si? Hla lei thiammi an si maw?

DD: Mark petu hna hi minung pali an si. Hla lei a thiam mi le a thei mi an si ko hna.

1.	Albert Ceu Hlun
2.	Pastor Lal Cung Awi
3.	Cung Tha (Australia in a rami)
4.	Lg Monica Uk hna an si.

SLP: Pakhatnak na si an thanh lio ah zeitindah na um?

DD: Pakhatnak ka rak ngah lio kha cu kai lawm tuk ti leng cun chim ding ka thei ti loh he..he.. "CYO hlasak zuamnak ah pakhatnak cu DC in Van Tha Hlei Dim a si" an van ti kha cu kai nuamh tuk nak ah seconds 10 hrawng khi cu zei hmanh ka thei lo. Ka pawngkam khi mui dih sehlaw a lo. Ka ngah sual lai lo ka timi ka thin a tur mi vialte zong kha an tlau dih i ka mitthli zawng a hai dih. A fawi nak in ka chim ahcun pakhatnak ka hmuh caan kha ka tuanbia chungah kai lawmh bik caan pakhat asi ve.

SLP: Na mawh hrimhrim lo, nuamh phu bak a si. A ho sin ko ah khin dah nai lawmh khun?

DD: Pathian sin le ka nu le ka pa, hlaphuahtu le a ka tumhtu hna, CYO hruaitu hna cungah kai lawm.

SLP: Hlasak hi hodah an cawnpiak?

DD: Hlasak hi chimtu le cawnpiaktu ngaingai cu ka ngei lo. Keimah zuamnak deuh lawng hi a si ko. CBMC ah hin solo sak hi an ka thiah ve tawn i, biakinn hi ka cawnnak bik cu a si ko.

SLP: Na nu le na pa hi hlasak an thiam ve maw?

DD: Ka nu le ka pa hi hlasak thiam an si lo. An rak nungak tlanval lio ah cun anmah helhnak tawkfang lawng an rak sa ko rua.

SLP: Biadang deuh ah, tuchan mino cu nan rak advance ngai ti kan theih. BF hna na ngei ve cang maw?

DD: Boy Friend maw? Atu rih ah cun tlangval uarmi cu ka ngei rih lo ka hngakchia ngai rih, hmailei kong tu cu ka chim kho ve lo…he…he…

SLP: Uarmi BF na ngeih tik zongah thianghlim tein i uar nai zuam lai mu.

DD: Kai lawm tuk, pasal ka ngeih hlan lo, virgin bak ka si ko lai.

SLP: Kan uar bak, hmailei ah VCD chuah hna nai tiim maw?

DD: A duh cu ka duh ko, Pathian nawl tu si te ko seh.

SLP: Laimi hlasak thiam ah na uarmi le mirang hlasak thiam ah na uar mi? Zei ruang ah dah na uar hna?

DD: Laimi hlasak thiam ah ka uar mi cu Dawt Hlei Hniang a si. Zuun hla a sak mi pawl tete khi kan uar ngai hna. Mirang hlasak thiam ah cun Shanai Twain le Celine Dion hi an si. An aw that hlei ah an hlasak i, an i biatak mi khi ka uar tuk hna.

SLP: Bia tlamtling tein na ka leh i kai lawm. Lai hawi sinah biacah na duhmi?

DD: Midang bia a va cah dingah kai tlak lem lo. Laimi le Khrihfa kan sinak te hi fek tein i tlaih peng ko hna u sih. Ramdang nundan ttha lo hi cawng loin an thatnak le an thiamnak tu hi tampi lak khawh i zuam hna u sih.