SLP: Na tuanbia tawi?

VSL: Pu Khawvelthanga le Pi Rohmingliani fa panga lak ah a hniang cem changtu, fapa neihchun ka si. Mizoram West Phaileng khua chuak ka si.

SLP: Cawnnak lei ah tah?

VSL: Tanghra tiang cu kan khua ah ka cawng. Tang 11, le 12 hi Aizawl ah ka cawng. Tang 12 ka cawn lio ah hin ka damlonak ruangah ka peh kho ti lo.

SLP: Hla lei ah na luhning?

VSL: Pu C Dinthanga (Lelte) nih hlaphel chuah dingah a ka sawmnak in mi nih an ka theihnak hi a si. Cu bantuk in hlaphel chuah dingah C Dinthanga sinah a ka theihtertu cu Pu Lalruanga hi asi. Atu US ram ah kan i hmu than i a cungah kai lawm tuk. Pu Lalruanga chuahmi hlaphel "Thazual Collection, Vol-6" ah khan "Zoram tang fanfan" ti hla pakhat ka rak sak ve.

SLP: Love song album hi zeizatdah nan chuah manh?

VSL: Love song hi album pakhat lawng ka chuah manh. A vei hnihnak chuah dingah hla fung sarih ka khumh cang nain Bawipa nih a ka auh caah ka pehzul ti lo. Mi zei nih dek a thli in an chuah i Mizoram pumpi ah an zuar, phaisa tam ngai an miak lio ah kei tu cu kutro in Jesuh hnu ka zul ve.

SLP: Love song na sak lio ah hin phaisa na hmuhning chim awk a tha hnga maw?

VSL: Zan khat ah hin thong hra an ka pek tawn, thla khat ah cun sing khat nak tam ka hmuh tawn. Love song ka sak chung hi kum khat le a cheu lawng a si. Ka chung le hi sifak khuate mi kan si. Ka chung le cawmnak le inn sakpiaknak ah ka hman i Love song saknak in hmuhmi phaisa cu khawn khawh ngaingai a rak si lo.

SLP: Na piantharnak kong hi theih kan duh ngai mi a si?

VSL: Ka piantharning hi cu ca in tial lo in, Chin ka unau hna sinah pulpit cung in thlacamnak he chim ka duh caah kan chim siang rih lai lo. A ngaih tu in rak ngai cio te ko hna she.

SLP: Na pianthar hnu ah Khrihfabu sawmtu hna nih love gift an in pe tam kho maw?

VSL: Sawm cu an ka sawm pah len ko. Sihmanhsehlaw, love song sak lio bantuk cun, cu zat nan ka pek lai, tiah chim awk a tha ve ti lo. Pathian hla zeizat ka sak zongah 100, 200 hna an ka pek. Ball pen le Note book an ka pek caan zong a um. Pek lo caan zong a um.

SLP: Cuti phaisa lei ah harnak na van ton cun, love song sak lio hna kha na van ngai pah lo maw?

VSL: Ngai rilmal ta. Hmanhseh zumhnak in ka kal caah zumh tlak Bawipa nih a ka umpi ve ko. Ka laksawng cu phaisa le rumnak si ti lo in, Bawipa rian ka tuan khawhmi tu hi a si deuh cang. A sunglawi tukmi cu vanram ah thlarau tlau ka hmuhmi hna he lunglawm tein Bawipa kut kan tlaih te lai. Halleluiah Amen.

SLP: Bawipa hnu na zulhning?

VSL: Bawipa Jesuh kawhnak aw hi tampi ka theih. Love song ka sak lio ah ka sualnak kai thei tawn lo nain ka awlok hi a chawng tawn. Hnangan daihnak ka ngei kho lo. Hi kong zong hi hmaitonh kan i hmuh tik tu ah tampi in kan chimh te hna lai. US ram ka um chung i crusade ka tuahnak ah rak ngai cio te dingah kan sawm hna. Nan hlawkpi ve hrimhrim lai tiah ka zumh ko.

SLP: Na hla pakhat, "Ka cell fawn thawng a hong ring" ti hla na phuahmi kha a taktak na tonmi asi theu lai. Fiang deuh in na kan chim kho hnga maw?

VSL: Cell fawn chung in bawmhnak a herhmi hna Pathian Bia in ka bawmhnak hna kong a si. Ka innkaa tiang zong an rak kingh tawn. Thawngtha ka chimmi kha Thiangthlarau nih fiannak a pek hna tikah, sual chir in lawmhnak mitthli a luangmi ka hmuhnak in Bawipa nih hi hla hi a ka pekmi a si.

SLP: Australia ram ah Chin unau hna sinah Thawngtha na va chim bal rua?

VSL: A si ko, thla hnih le a cheu tluk Chin unau hna sinah Thawngtha ka va chim. Vawleicung minung ka hmuhmi hna lak ah Chin unau hna tluk in nun a siangmi le khual dawt a thiammi hi ka hmu bal hna loh" tiah Aizawl zong ah TV le cazual chung bia an ka halnak ah ka chim. Cun thlacam thawnnak a zum ngammi, Thawngtha ngaih a huam mi, nan sinak kong hi ka phaknak kip ah ka chim tawn. Nan cungah lawmhnak nganpi ka ngei.

SLP: Chin unau hna he nan i pehtlaihning?

VSL: Chin unau hna he kan i kawmh hnu hin ka thinlung tak tein tlaihchannak nganpi kan ngei hna. Mizoram ka hawi le sin tiang hin, "Australia i Chin unau hna kha ka ngai tuk hna" ka ti le an ka nih tawn. Face book chung in ram kip um Chin unau hna hmanthlak le nan konglam tampi zong ka rel. Chin National Day nan tuahmi hrim khi a ropui tuk ka ti. Aizawl ka phak hnu ah Australia an hawi le nih an van chimh hna tikah ka inn zongah an rak ka leng ve. Bawmh a herhnak zawn poah ah bawmh ding zong in kai pe. Aizawl khua i Chin Welfare Society an dirhmi zongah Co-ordinator ah an ka thim ve. Cuticun Chin unau hna cu ka unau taktak ah ka ruah hna. An biakinn zongah phung hna ka va chim.

SLP: Mizoram chung Burma mi kong ah zeital na bawmh khawhmi hna a um maw?

VSL: Burma mi nih thil ti sual a um caan zongah Mizo mipi sinah ngaihthiam ding in ka nawl tawn hna. Jesuh Khrih nih vailamcung in a ka khamh lio ah khan, Chin unau vialte zong a khamh ve hna. Keimah a ka dawt bantuk in a dawt ve hna, ti hi ka fiang. Jesuh thisen cu keimah caah a chuah zat tein Chin unau hna ca zongah a chuak ve. Van Bawi nau bang a tahnak Kalvary ah unau kan si dih hna. A sualmi nih sualman a tuar ko lai, a sual lo mi caah cun ka dirkamh peng ve ko hna lai.

SLP: Na hlasakmi hi a nung ngaingai, zeitindah nai timhlamhning an si?

VSL: Ka hlasak ding hi sak vekvek ahcun thinlung tak tein sak ka duh. Ka hla phuahmi hna zong hi hei ruahchawm si loin Thiangthlarau nih a ka pekmi an si. A awthluk hi a ka pek hmasa tawn, cu hnu ah cun a hlabia a ka pek tawn. Hla ka sak ah hin Thawngtha ka chim ti tluk tein ka thinlung ah a um. Thlacamnak hen thinlung tak tein ka sak zungzal caah Bawipa nih thluachuah a pek tiah ka zumh.

SLP: Chin unau hna sinah biacah na duhmi?

VSL: Chin ka unau hna sinah cah ka duhmi cu, "Ramdang ah hin thi dingah maw nan kal nung ding ah dah nan kal?" ti hi asi. Mi tampi hna cu ram tha ah hin a nuamhnak le a thluachuah lawng duh in an Thlarau tu cu thihnak lei an panhpi tawn. Chin unau hna cu America ram ah Thawngtha mei a mit cuahmah cang mi hi alhter than dingah Bawipa nih an kalter mi hna a si. Nan Baibal cio kha van keu ulaw van rel ve hmanh u, Deutoronomy 6:10-17 bia hi.

SLP: Kan bia na kan leh caah tampi kan i lawm. Bawipa rian na tuannak ah Thiangthlarau nih in umpi zungzal ko seh.

VSL: Kai lawm tuk ve. Thlacamnak he rak ka bawm zungzal dingah kan sawm hna.